USA ka 27 anyos nga ulitawo namatay human giluba sa alas 10:00 sa gabii niadtong Sabado didto sa dakbayan sa Kidapawan.

Nailhan sa kapulisan ang biktima nga mao si Danilo Daza, walay trabaho ug molupyo sa Sitio Maligaya, Barangay Balindog.

Sigun sa taho gikan sa Cotabato Police Provincial Office nga kauban sa biktima ang iyang manghod nga si Jegger nga nag-inom sa usa ka tindahan duol sa City Plaza. Gumikan sa sobrang kahubog, wala na sila makauli ug nakatulog na lamang sa bangko.

Apan giduol sa duha ka wala mailhing tawo si Daza ug gitabangan sa dunggab gamit ang kutsilyo.

Dali sab nga misibat ang mga mamumuno paingon sa wala matino nga direksyon. Nakamata na lamang si Jegger nga naligo na sa kaugalingong dugo ang iyang igsuon. Gisapupo dayon ang biktima sa manghod ug gidala sa Kidapawan Doctors Hospital. Apan gideklara siya sa attending physician nga dead on arrival.

Ang biktima nakaangkon og lima ka mga samad dinunggaban sa nagkadaiyang parte sa iyang lawas.

Matud ni Jegger nga sa wa pa gipatay ang iyang magulang, nakasulti siya nga dunay grupo kining naka-away sulod sa merkado publiko.

Ang kapulisan padayong nag-imbestiga aron nga masayran ang tinuod nga motibo sa pagpatay sa biktima. (Edgardo Fuerzas)