USA ang patay samtang duha ang samdan sa ma­naglahing insidente sa pagpamusil sa dakbayan sa Sugbo kagahapon ug niadtong Sabado sa gabii.

Padayon pa karong gipa­ngita ang duha ka mga mamumuno nga nipatay kang Ado­nis Altar, 31, residente sa dan Abellana, Brgy. Luz dihang gipusil kini sulod sa Sports Complex sa maong barangay.

Pasado alas 6:00 sa gabii, niadtong Sabado dihang gipusil-patay si Altar kinsa nakaangkon og samad pinusilan sa ubos sa wala nga apapangig niini.

Samtang, samdan usab sila si Anthony Mark Vasaylleje, 33, alyas Waway ug Ritchie Canoy, 25, dihang adunay kalit nga nipusil kanila sa Sitio Mansanitas, Barangay Duljo kagahapon sa kaadlawon.

Base sa imbestigasyon sa kapulisan, nasayran nga nag-i­nom si Vasaylleje og ilimnong makahubog kilid sa dalan sa naasoy nga lugar dihang kalit lang nga niabot ang mamumuno ug kalit siya nga gipusil.

Samdan si Vasaylleje sa wala nga bahin sa iyang tiyan, diin naangol usab si Canoy nga anaa ra gabarog kilid sa tindahan nga duol sa dapit ug nakaangkon kini og samad pinusilan sa iyang wala nga paa.

Nasuta nga human sa pagpamusil, nikaratil pagdagan ang mamumuno sa naghuwat nga motorsiklo diin sakay niini ang iyang kauban nga maoy nagmaneho.

Gisuta pa sa kaulisan ang posibleng motibo sa parehong insidente sa pagpamusil sa dakbayan.