MOABOT sa 106 ka mga tawo ang nasikop sa kapulisan sa lainlaing mga barangay sa dakbayan sa Sugbo atol sa One Time Big Time nga operasyon niadtong Biyernes sa hapon.

Si Supt. Ryan Devaras, hepe sa Investigation and Detective Management Branch, nibutyag kasagaran sa mga dinakpan kay nalambigit sa sugal ug ginadili nga drugas.

Sa 106, 57 ka personalidad gidakop sa pagla­pas sa Presidential Decree 1602 nga nagsilot sa mga tawo nga nagsugal samtang ang 19 niini nasakpan nakalapas sa Republic Act 9287 nga nagsilot sa mga indibidwal nga nalambigit sa illegal numbers game.

Nasikop usab ang 10 ka drug users ug pushers. Gibanabanang nagbalor og P19,264 ang nasakmit nga shabu, tulo ka kalibre sa .38 revolver, usa ka kutsilyo, 18 ka video carrera ug moli-moli machines ug P3,613 nga cash.