NAPALGANG patay ang usa ka bata human nalumos niadtong Martes sa hapon sa Iponan river ning Dakbayan sa Cagayan de Oro.

Nalumos patay ang biktima nga gi-ilang si Christian Bacalso, lumulupyo sa Zone 7, Tambo, Bulua ning dakbayan.

Subay sa report nga nakurat ang lolo sa biktima nga si Jesus Bacalso dihang gipahibalo sa laing mga apo nga nalumos ug wala na milutaw ang biktima human sila nangaligo sa nahisgutang suba.

Nasayran nga kauban sa biktima nga nangaligo ang mga ig-agaw ug igsoon niini.

Nangunay sa pagsalom ang lolo sa biktima bisan dili kini kabalo molangoy aron lamang nga maluwas pa ang biktima. Nasubo kini sa dihang nasaghiran sa iyang tiil ang patay nga lawas sa apo.

Giingong lalom ang tubig niadtong higayona tungod kay nag-uwan sa bukid nga bahin.

Sa pagsulat niini nga balita, gi-atiman na sa nahibiling pamilya sa biktima ang patay nga lawas sa bata.