ILIGAN CITY -- Patay ang duha ka mga security guard human mabanggan ang kan-anan sa usa ka sakyanan alas 2 sa kadlawon niadtong Dominggo, Pebrero 5, daplin sa national highway sa Barangay Tibanga ning dakbayan.

Naila ang mga biktima nga sila si Quirino Duhaylungsod, taga-Purok Mauswagon, Barangay Santa Filomena ug Arestrio Clamor, taga-Purok Mangga, Barangay Tubod.

Samaran usab sa maong panghitabo si Noel Luna, 20, taga-Zone 9 Barangay Bagong Silang.

Dead-on-the spot sila si Duhaylungsod ug Clamor tungod sa kakusog sa pagkabangga sa usa ka sakyanan nga paingon sa sentrong bahin sa dakbayan nga gimaneho sa negosyante'ng si Edward Lorente, 34, taga-Barangay Upper Tominobo.

Nasayran nga ang usa sa duha ka gwardiya igo lamang nangayo og init nga tubig aron mangape dihang nahitabo ang insidente.

Kasamtangang nakatanggong sa Iligan City Police Station 5 ang driver nga posibleng mag-atubang sa reklamo'ng reckless imprudence resulting to multiple homicide and damage to property.