MOKABAT sa trayenta ka mga istasyonan sa radyo sa Davao Region ang masirad-an gumikan sa wa pagtuman sa mga resikitos sa National Telecommunication Office (NTC)-Davao.

Kini ang gibutyag ni NTC-Davao director Nelson Cañete atol sa AFP-PNP press conference niadtong Miyerkules.

Suma sa opisyal nga kasamtangan nilang gihulat ang approval gikan sa ilang national office aron masirhan ang trayenta ka istasyonan.

"Kung moabot na ang order gikan sa atong higher office, magsugod na ta sa pagsilbi sa cease and desist order at the same time ang show cause order sa atong 30 identified illegal radio stations," sulti ni Cañete.

Nasayran nga dunay mokabat 26 ka mga istasyonan sa radyo ang isyuhan og cease and desist order samtang dunay upat alang sa show cause order.

Giingon ni Cañete nga daan na nilang gipahibalo ang mga nanag-iya sa giingong mga ilegal nga radio stations aron di na sila matingala ugaling kalit nalang silang ipasira sa NTC-Davao.

"Nagpadayon atong mga pag-inspection, pero naay mga istasyon nga motingog bisan walay mga tawo sa sulod. Unsaon pagsulod nga wala may tawo,” ingon ni Cañete kinsa nasagmuyo sa maong hitabo.

Ning kasamtangan, gihulat nalang sa NTC-Davao ang approval gikan sa NTC Central Office.