DIGOS CITY - Upat ka mga usher ug usa ka tayador sa ilegal nga sugal nga last two ang giratsada nga gipangsikop sa mga sakop sa Digos City Police Office (DCPO) human naaktuhang nagpataya sa numero sa managlahing dapit sa dakbayan.

Gisugdan sa kapulisan ang pagronda palibot sa siyudad alas 7:40 sa gabii, Huwebes.

Sumala ni Chief Insp. Edmund Montillano, nangulo sa Regional Mobile Force Battalion sa paglusad sa hiniusang operasyon, kuyog ang mga sakop sa DCPO nga miresulta sa pagkasikop sa mga usher nga sila Veronica Flores, 35, minyo, taga dalang Gallarde sa Barangay Zone 2, Leonora Tapdasan, 44, molupyo sa Chapter 5, Barangay Aplaya, Rebecca Tomarong, 70, biyuda, molupyo sa dalang Bonifacio-Boho Avenue ug tayador nga si Claudia Tampos, 60, dalaga nga taga Ravina Compound sa Barangay Zone 1.

Gibutyag ni PO2 Joel Ong, imbestigador sa kapulisan nga nakuha sa posisyon sa mga suspek ang mga nagkadaiyang matang sa gambling paraphernalia ug salaping mosumada sa P635.

Gitataw sa kapulisan nga luyo sa ilang pahimangno nga bugtong ang Small Town Lottery (STL) na lamang nga ilawom sa pagduma sa Philippine Charity Sweepstakes Office (PCSO) ang gitugtang tayaanan sa mga sugarol apan padayon gihapong nagmagahi ang uban nga motuman sa balaod.

Di sab palutson sa kapulisan ang tayador nga maaktuhang mitaya kay apil silang kasohan.

Gikostudiya na sa DCPO ang mga dinakpan samtang gihikay nila ang kasong paglapas sa Republic Act 9287 kun Anti-illegal Gambling Law sa nasud.