COTABATO CITY - Misaka na sa 47 ka mga miyembro sa Bangsamoro Islamic Freedom Fighters (BIFF) ang na-neutralize sa sunod-sunod nga military operations didto sa Central Mindanao.

Matud ni Western Mindanao Command Commander Carlito Galvez Jr. nga 21 ang napatay ug 26 ang naangol sa gilusad nga air strikes and ground combat operations sa mga sundalo ubos sa Joint Task Force Central nga gipangulohan ni 6th Infantry Division Chief Arnel de la Vega.

Nagsugod ang offensive operation niadtong Marso 13 hangtud 16 partikular sa Barangay Tee, Datu Salibo, Maguindanao Province.

Sa mga operasyon, nakuha sab ang lima ka improvised explosive devices apil na niini ang upat ka pressure-type ug usa ka command detonated bomb.

Narekober sab ang daghanang bomb component ug mga notebook kon paunsa ang paghimo og bomba.

Nasayran nga target sa operasyon sa militar ang grupo sa mga foreign terrorist nga si Muhammad Ali Bin Abdulrahman, alyas Muawiyah ug ang mga kauban niini nga local terrorist nga iyang gibansay nga sila Salahuddin Hassan ug si Esmael Abdulmalik, alyas Abu Toraype, kinsa maoy nagmugna sa Dawlah Islamiyah Maguindanao ug nagsilbi sab nga BIFF Brigade Commander.

Gikanayon ni Galvez nga ila sab nga giberipika ang taho nga apil sa mga napatay ang naasoy nga mga terorista.

Apan ang taho sa militar igo lamang gikataw-an ni Bangsamoro Islamic Freedom Movement Spokesman Abu Misry Mama nga walay kamatuoran og hinimo-himo lamang sa 6th Infantry Division sa Philippine Army.