NABUAK ang ulo sa amahan ug anak human nabangga ang gisakyang motorsiklo niadtong Dominggo alas 8:00 sa gabii sa Bauk-Bauk lungsod sa Balingoan, Misamis Oriental.

Patay sila Ronnie Gagnan Sr., 40, ug anak nga mao si Ronnie Jr., 19, ulitawo pulos residente sa Barangay Mintabon, lungsod sa Talisayan, Misamis Oriental.

Gibutyag sa sakop sa pamilya nga gikan nag-inom ang mga biktima dihang nanglakaw paingon sa Balingoan apan paghidangat sa dapit nabangga sa elf miresulta sa pagkalagpot sa mga biktima ug maayong pagkabuak sa ilang ulo.

Ang anak dead on the spot sa insidente samtang ang amahan nadala sa Talisayan Provincial Hospital apan tungod kay grabe ang kahimtang niini gidala sa Northern Mindanao Medical Center (NMMC) sa Cagayan de Oro City apan kagahapon sa kadlawon nakabsan gihapon sa iyang kinabuhi.

Matud sa igsuon nga labihan ang ilang kasubo ning panahona tungod kay duha gyod ka sakop sa pamilya ang nakalas.

Ang driver sa elf kinsa ning panahona detinado na karon sa Balingoan Police Station ang namahayag nga ang motorsiklo maoy nibangga kanila ug namatikdan nga labihan kakusog sa dagan gawas niini walay gipangsul-ob nga helmet.

Hinoun ang pamilya desididong mopasaka og kasong reckle imprudence resulting to homicide and damage to property batok sa detinadong driver.