NAGTINGKAGOL sa prisuhan ang usa ka lalaki human nadakpan sa drug buy bust operation nga gipahigayon sa lungsod sa Villanueva, Misamis Oriental.

Giila ang dinakpan nga si Elmer Factura,45, taga San Martin, susamang lungsod.

Ang operasyon gihimo mismo sa Villanueva Police Station sa pagpangulo ni Police Senior Inspector Dennis Ebsolo.

Gibutyag ni Ebsolo nga ilang gikasa ang operasyon human sa sunod sunod nga beripikasyon ug monitoring batok sa dinakpan.

“Nag conduct ta og drugbust kaniya, later nahibaloan nato pagkadakpan nga anak diay kini siya sa kanhi kagawad pero mao pa kini atong sutaon labina bag-o paman ko diri nadestino,” pahayag ni Ebsolo kinsa bag-ohay lang usab mihulip sa hepe nga si Police Senior Inspector Rodney Gaid sa maong dapit.

Ang dinakpan napalitan og balor P500 nga gitouhang shabu ug nasakmit ang motorsiklo nga giingong gamitunon niini sa mga transaksyon.

Gisuta pa usab karon sa kapolisan kung kinsa ang iyang mga source sa ginadili nga druga aron maplanohan og operasyon.

Kasong kasupakan sa Republic Act 9165 kon Dangerous Drugs Act ang atubangon sa suspetsado karong panahona.