HUMAN nakabulawan si Margarita Ochoa alang sa Team Philippines sa newaza (ground technique) women’s 45 kilogram (kg) niadtong Dominggo, Setyembre 25, ang iyang jiu jitsu teammate nga si Annie Ramirez misunod sab pagbingwit og laing bulawang medalya sa newaza women's 55kg finals niadtong Lunes, Setyembre 26, sa nagapadayong 5th Asian Beach Games didto sa Bien Dong Park sa Danang, Vietnam.

Gipildi ni Ramirez si Siramold Deepudsa sa Thailand, 10-0, sa ilang championship match aron makuha ang iyang ikaduhang sagunsong Asian Beach Games gold human sa newaza women’s -60 kg title sa Phuket, Thailand niadtong 2014.

Ang 25-anyos taga-Naga City, usa ka Olympic Council of Asia (OCA) Asian Beach Games website report, miingon, “I was aiming for gold when I came here.”

“I feel I have defended my title,” dugang sa Academia John Baylon-Clube de Jiu-Jitsu Filipinas.

Samtang, ang three-time Olympian nga si Marestella Torres Sunang nakakuha og bronze medalya sa women’s long jump didto sa Son Thuy Beach.

Miambak siya sa gitas-on og 6.10 metros sa iyang ikalimang pagsulay.

Si Vietnam entries Thao Bui Thi Thu (6.32m) ug Mai Nguyen Thi (6.11) nakakuha sa bulawan ug platang medalya sa maong han-ay.

Ang Pilipinas duna nay duha ka bulawan, usa ka plata ug 10 bronze sa kasamtangan.