GAWAS nga mabutangan og dugang mental health facilities, tumong usab sa Philippine Mental Health Act of 2017 nga mahatagan og pagtagad kining mga suicidal nga sagad na karon nihimo niini mga batan-on na.

Matod ni Senator Risa Hontiveros nga anaa na sa 3rd and final reading ang maong balaudnon sa senado samtang napasar na usab kini sa second reading sa house of representative.

Dugang sa Senador nga kon mapasar na kini sa kongreso, i-consolidate sa Bicameral Conference Committee ang duha ka version aron hingpit na kini nga mapirmahan sa presidente.

Usa sa mandato sa maong balaudnon kining mapalapdan ang psychiatric, psycho-social, neurological services sa tanang tertiary, provincial ug regional hospital sa nasod.

Dugang ni Hontiveros nga base usab sa balaudnon nga kinahanglan mapadaghan ang mental health professionals susama sa psychiatrist ug ubang health service providers lakip niini sa barangay level.

“Para kung hindi man sila makaresponse (barangay health workers), yung mga service user (patients), ma refer nila dun sa service delivery network ng DOH (Department of Health),” matod sa senadora nga nibisita sa Sugbo kagahapon.

Tumong usab sa balaod nga matangtang na ang stigma ug diskriminasyon sa aduna’y mental health nga tawo.

“Mandate sa mental health bill, sa Department of Education and Commission on Higher Education na magkaroon ng on-campus mental health programs para mawala ang stigma and discrimination sa mental health problems,” panapos sa senadora. (HBL)