MALAUMON ang Me­tro Cebu Development Co­ordinating Board (MCDCB) nga mapasar na karong tuiga ang gidusong balaudnon ngadto sa Kongreso nga maghimo sa Metro Ce­bu Development Autho­rity (MCDA).

Matod ni Evelyn Nacario-Castro, MCDCB research, program and organizational development, nga wa mapasar ang maong bill sa 16th Congress.

Dugang niya nga gi-file pagbalik ni Kongresista Raul Del Mar ang bill sa 17th Congress.

Matod ni Dionisio C. Ledres, assistant director sa National Economic and Development Authority (NEDA) 7, nga gipatawag sila kauban ang ubang miyembro sa MCDCB sa Kongreso aron mohatag og input sa maong bill.

Tumong sa House Bill 6227 nga mahatagan og tubag ang mga problema nga giatubang karon sa Me­ga Cebu gikan sa dakba­yan sa Danao ngadto sa Carcar.

Usa sa problema nga tumong nga sulbaron sa MCDA mao ang trapiko ug transportasyon.

Subay niini, usa ka study tour ang gihimo sa mga miyembro sa MCDCB sa nagkadaiyang dapit sa kalibutan.

Usa sa niuban niini si Naga City Mayor Cristine Vannesa Chiong diin gibisita nila ang New York sa Estados Unidos, Tokyo sa Japan, Seoul sa South Korea ug Paris sa France.

Matod sa mayor nga usa ang maayong transport system nga giisip nga backbone sa kalambuan sa usa ka metropolitan area.

Lakip sa nitambong sa maong tour sila si Ledres, Consolacion Mayor Teresa Pepito-Alegado ug si Castro. Sun.Star Cebu