COTABATO CITY - Nadakpan sa hiniusang puwersa sa Joint Task Force Central sa militar ug Task Force Ittihad sa Moro Islamic Liberation Front (MILF) ang giingong bomb expert sa Bangsamoro Islamic Liberation Front (BIFF) alas 5:19 sa hapon niadtong Miyerkules sa Datu Salibo, Maguindanao Province.

Giila ang dinakpan nga si Mahadih Abdulla, alyas Kumander Rok, 27, minyo, sakop sa BIFF-ISIS Inspired Group ug molupyo sa Brgy Pagatin, Datu Salibo.

Matud ni 6th Infantry (Kampilan) Division Public Affairs Chief, Captain Arvin Encinas nga nadakpan si Abdulla sa floating restaurant sa Barangay Sambulawan sa Datu Salibo.

Ang suspek kanhi nga gibansay sa napatay nga Malaysian bomb exbert nga si Zulkifli bin Hir sa paggama og bomba.

Miyembro sab siya sa BIFF hit squad, target ang mga off duty soldiers nga moagi sakay sa mga motorsiklo sa Maguindanao Highway ug pagpamomba sa convoy sa mga sundalo.

Nakuha gikan sa posisyon sa suspek ang usa ka granada ug usa ka kalibre .45 nga pistola.

Gikanayon ni 601st Brigade Commander, Colonel Diosdado Carreon nga dugay na nilang gipanid-an si Abdulla ug gidakop dayon sa diha nga migawas kini sa iyang gitaguan.

Ang suspek padayon nga gi-imbestigahan sa militar ug gitakda nga itunol ngadto sa Criminal Investigation and Detection Group sa Autonomous Region in Muslim Mindanao.