ANG Davao City National High School (DCNHS) ug Ateneo de Davao University (ADDU) spikers miposte og duha ka kadaugan sa boys division sa pagsugod sa 80th Araw ng Dabaw Sports Festival Inter-Secondary Volleyball Tournament sa Almendras Gym Davao City Recreation Center.

Ang DCNHS mipildi sa Assumption College of Davao (ACD), 25-12, 25-20, 28-26 una gipukan ang General Baptist Bible College (GBBC), 25-10, 25-23 sa pool B.

Ang ADDU, sa ilang bahin, mipildi sa Precious International School of Davao (PISD), 25-13, 19-25, 25-16 human milabni sa 25-5, 23-25, 25-16 nga kadaugan kontra Philippine Nikkei Jin Kai International School (PNJKIS) sa pool A.

Ang Jose Maria College (JMC) ug University of the Immaculate Conception (UIC) naka-angkon sab og kadaugan sa torneyo nga gi-organisa sa Davao Volleyball Association ug giisponsoran sa Sports Development Division of the City Mayor's Office.

Ang UIC milampurnas sa GBBC, 25-1, 25-16, sa duha ka sets, samtang ang JMC mipatumba sa PISD, 25-20, 25-12.

Sa distaff side, ang DCNHS nanguna sa UIC, 22-25, 25-21, 25-10 samtang ang Addu mipayukbo sa PNJKIS, 25-20, 25-13.

Ang ACD ug JMC miangkon sab og kadaugan.

Ang duwa mobalik karong Dominggo, tali Ateneo kontra JMC sa alas 8:45 a.m. ug DCNHS kontra ACD sa alas 9:30 a.m. sa girls division, PNJKIS vs JMC sa 11 a.m. ug ACD vs UIC sa 12:30 p.m. sa boys category.

Dugang lima pa ka duwa ang himuon hangtud alas singko sa hapon.