DAKO ang kabalaka ni Kapitan Marvin Beja, sa Barangay Puntod, sa paingnan sa mga biktima sa demolisyon sa Cilrai, Macabalan ning Dakbayan sa Cagayan de Oro.

Gibutyag ni Beja nga kagahapong adlawa ang skedyul sa demolisyon ug gikabalaka niini nga basin manukol ang mga residente.

Nasabtan ni Beja nganong buot pakigbisogan sa mga residente ang ilang mga panimalay, kini tungod kay dinhi sila gipakataw, nagdako, ug nanginabuhi.

Gilauman ni Beja nga unta mohatag og kadasig ang kagamhanang lokal ngadto sa mga biktima sa demolisyon nga aduna sila'y mabalhinan aron mahupay usab ang ilang mga kabalaka sa mga residente ug masiguro nga duna sila'y mabalhinan.

Dugang ni Beja nga daw kanus-a pa molihok ang kagamhanan. “Aysa pa motabang kung patay na?”

Mahinumduman, niadtong Abril 29 unta ang gikatakdang demolisyon sa dapit apan gihatagan kini og lugway sa Regional Trial Court-10 Branch 25 aron makahinay hinay sa pagpamalhin ang mga residente.

Duha ka mga grupo sa maong dapit ang maapektuha diin mao ang Cagayan Integrated Landless Residents Association ug Pundok sa Katawhan sa Macabalan.

Una na usab nga gianunsiyo ni Sheriff Love Verdadero nga gilugwayan ang demolisyon aron makabalhin sa Balubal relocation site ang mga residente.

Nasayran nga aduna'y eligibility criteria aron malakip nga makadawat sa relocation package alang sa Socialized Housing Program diin ang makabenipisyo niini kinahanglan nga underprivileged, homeless citizen ug walay real property.