WA makaipsot sa mga tinugyanan sa balaod si Ricardo Ramirez, kanhi Medellin mayor ug karon konsehal, atol sa ronda kagahapon sa iyang panimalay sa Sitio Litsa, Barangay Caputatan Sur sa Medellin, Cebu.

Nasakmit gikan sa iyang panimalay ang way lisensyang mga tag-as nga armas sama sa duha ka M16 rifles, duha ka M4 rifles, usa ka M14 rifle, upat ka .22 caliber rifle, .45 pisto, 9 mm ug daghang mga bala.

Gawas sa mga armas, duna usay digital nga timbangan ug ingon man drug paraphernalia o mga gamit alang sa pagsuyop og shabu.

Niadtong Hulyo 6, tulo ka mga municipal officials sa lungsod sa San Fernando ang gipang-aresto usab atol sa ronda.

Sila si Councilors Edwin Villaver ug Alfonso Donaire ang gipangbilanggo human makuhai og armas ingon man shabu nga mokantidad og P296,000 samtang si Councilor Johnny Arriesgado, ABC president sa maong lungsod, nakuhaan usab og armas.

Sa intelligence report sa PRO 7, ang tulo gihulagway nga mga drug protectors ug ingon man kakunsabo sa inilang drug lord nga misurender nga si Franz Sabalones, igsuon sa vice mayor sa maong lungsod nga si Fralz.

Laing nasignit niadtong Hulyo 4, ang usa ka barangay kapitan nga babaye sa Maribago, Badian nga si Epifania Divinagracia Alvizo, 52. Nakuha gikan ni Alvizo ang 550 gramos nga shabu nga mokantidad og P1.5 million.

Si Mark Ferdinand Bas, kapitan sa Barangay Lagtang, ang nasikop usab atol sa buy-bust operation niadtong Abril 18, 2017. Sila ang pipila lang sa mga narco-politicians sa Sugbo nga maoy hinungdan kon nganong nahimo kitang hot spot sa gidiling drugas, sigon sa gibutyag ni Presidente Rodrigo Duterte.

Hinaot nga magpadayon ang mainiton nga kampanya ug di nato ikasurprisa nga daghan ma unya ang isunod.