WAY katungod ang mga opisyal sa Barangay Ermita, siyudad sa Sugbo nga mangolekta og P10 gikan sa mga sidewalk vendor sa Carbon Public Market, sumala sa labing taas nga opisyal sa Department of Interior and Local Government sa Central Visayas.

Si DILG 7 Director Rene Burdeos niingon ang kagamhanan sa dakbayan sa Sugbo ang dunay katungod nga mangolekta sa mga manindahay sanglit kini ang nanag-iya sa Carbon Public Market.

Siya namahayag nga bisan og voluntary ang paghatag sa mga vendor og P10 ngadto sa Ermita di gihapon kini angay ipadayon sa hingtungdan nga barangay.

“Ang barangay way katungod mangolekta og buhis sama sa gibuhat sa Barangay Ermita kay wala silay labot sa city-owned properties, ang siyudad ra ang makahimo ana,” pasabot sa director sa pakighinabi sa Superbalita Cebu kagahapon.

Matod ni Burdeos si Cebu City Mayor Tomas Osmeña dunay katungod nga mobadlong ni Ermita Barangay Kapitan Felicisimo “Imok” Rupinta sanglit kini ang amahan sa siyudad ug ang mga kapitan sa barangay ubos sa gahom sa mayor.

Siya nipaluyo sa tinguha ni Osmeña nga mopasaka og kasong kriminal batok kang Rupinta ug mga konsehal sa barangay kon magpadayon sa pagpangolekta og P10 gikan sa mga manindahay.