NAGTUO si One Championship chairman Chatri Sityodtong nga si Filipino mixed martial arts (MMA) star Eduard Folayang maoy makasunod sa lakang ni boxing icon Manny Pacquiao isip usa ka global sports icon.

Si Pacquiao nagpabiling bugtong boksidor sa kalibutan nga nakalangkat og world boxing titles sa walo ka managlahing weight divisions, katulo napiling Fighter of the Year ug napasidunggan isip Fighter of the Decade.

Apan ning puntoha, tataw nga nagkaduol na ang utlanan sa boxing career ni Pacquiao ug sa dili madugay, moretiro na kini.

Alang kang Sityodtong, si Folayang maoy perpektong makasunod sa lakang sa Pambansang Kamao sa Pilipinas.

“My dream is to see a local star become a national star, and then he becomes a global superstar,” batbat ni Sityodtong sa interbyu sa GMAnews.TV. “I think that in Eduard Folayang, we have a big potential there.”

Sa MMA, si Folayang nahimong world champion pinaagi sa third round technical knockout nga kadaugan batok sa mas inilog nga si Shinya Aoki.