USA ka video clip gikan sa VGTV, usa ka news network sa Norway, ang gikalat sa social media.

Makita ang usa ka walo ka anyos nga batang lalaki nga nakigdula sa usa ka Amerikanong chess hustler sa New York City Chess Park.

Kasagaran mga chess hustlers gadula og chess para manginabuhi. Halos tibuok chess clubs sa kalibutan adunay mga hustler.

Niadtong tungora, wala masayod ang Amerikanong chess hustler nga gitudloan ang batang lalaki matag duso niya.

Ang bata naggamit og ear plugs ug madung-gan niya ang mga mando sa walay lain nga si Grandmaster Magnus Carlsen, ang kasamtangang World Chess Champion gikan Norway.

Naa sa distansya si Carlsen, samtang ang cameraman sa network mao ang gabahog sa live streaming sa dula nila.

Lingo-lingo ang Amerikano hangtod gitumba niya ang iyang hari isip pag-resign sa dula, samtang ang mga manan-away naenganyo sa bata.

Gi-interview ang hustler sa reporter ug nakaingon siya nga maayo kaayo ang bata.

Apan, gisayran siya sa reporter human nga giilad lang siya ug iyang tinuod nga kadula walay lain kung di ang world number one.

Leksyon sa mga hustler: ayaw’g dula nga naay ear plugs ang inyong makuhit nga kaatbang basin kamo i-costumer sa kailad.