DIGOS CITY - Nakigduyog ang mga opisyal sa siyudad ngadto sa mga katawhan sa Barangay Kapatagan atol sa pagtak-op sa usa ka semanang kalingawan nga gitawag ‘Paskohan ug Sugbahan sa Kapatagan,’ adlaw’ng Sabado.

Mitambong sab si Mayor Joseph Peñas sa kulminasyon sa programa ug gipaabot niini ang iyang mainitong pagtimbaya sa mga katawhan sa lugar.

Bisan si Hagonoy Mayor Conrado Laza, kinsa pamuno sa League of Municipalities of the Philippines (LMP) sa Davao del Sur, nakigduyog sa selebrasyon.

Suma ni Laza ug Peñas nga dili lalim ang gipasiugdahang selebrasyon matag tuig sa mga katawhan ug opisyal sa Kapatagan sanglit milahutay gyud kini sud sa pipila na ka katuigan.

Samtang, si Barangay Kapatagan Santiago Morales nagbutyag nga

ang maong okasyon nagsimbolo sa panaghiusa sa tanang katawhan sa lugar.

Gikanayon ni Morales nga usab kini ka higayon aron mabati sa matag usa ang espiritu sa Pasko nga puno sa pagmaya bisan pa man sa mga kalisod nga ilang naagian sa takna nga moubos ang produksyon sa ilang mga produktong gulay.

Ang selebrasyon adunay temang “Lig-on ang Familia, Lig-on ang Barangay.” (Orlando B. Dinoy)