MASINATI sa Sugbo ang init nga panahon karong semanaha, apan usahay dunay pat-ak pat-ak nga pag-ulan labi na sa hapon o gabii.

Si Romeo Aguirre, weather specialist sa Philippine Atmospheric, Geophysical and Astronomical Services Administration (Pagasa) Mactan, niingon nga karong adlawa gipaabot nga mogawas ang low pressure area sa Philippine Area of Responsibility karong adlawa o mahilis.

Ang LPA bisan kon wa mamahimo nga bagyo, apan nagdala kini og ulan sa Kabisay-an labi na sa Sugbo sa miaging mga adlaw.

Matod ni Aguirre, nga base sa ilang model, way naporma nga pundok sa mga panganod sa Pacific Ocean sa mosunod nga tulo ka adlaw.

Apan ang Eastern Visayas ulanon ugma tungod sa tail-end of a cold front.

Siya nidugang nga ang easterlies kun init nga hangin mobalik sa Miyerkules ug maoy magpasulabi sa Sugbo.

Matod ni Engr. Al Quiblat, officer-in-charge sa Pagasa Cebu basta summer, ang dagat sa Pacific Ocean kay bugnaw, hinungdan minos lang ang ulan kay ang LPA nanginahanglan og init nga surface temperature sa dagat aron mahimo nga bagyo.

Siya niingon nga base sa forecast mo-average og 0 ngadto sa usa ka bagyo ang mosud sa nasod sa Pebrero hangtod sa Abril.

Si Quiblat nipasabot nga minos lang ang kahigayonan nga magdala og daghan nga ulan kon naay mahimo nga bagyo sa maong mga buwan bisan kon dunay hinay nga La Niña nga gipaabot mahuman sa Mayo. (SCG)