NABUKOL ang ulo sa aktres nga si Jolina Magdangal human nabanggaan sa usa ka van sa iyang gisakyang SUV didto sa sa East Avenue, Quezon City kagahapon sa kadlawon.

Matud ni Orly Sebolino, drayber sa Mitsubishi Montero, sakay niya ang aktres, bana niining si Marc Escueta ug ang ilang 3 anyos nga anak.

Dugang niya, pagawas na sila sa EDSA ug mihunong sa atubangan sa stoplight sa dihang mibangga ang usa ka puti nga Nissan Urvan.

Sumala sa pasahero sa van nga si Miriam Bondoc, pauli na sila sa Makati dihang nakatulog ang drayber nga si Peter Sevilla.

Naguba ang bumper ug salamin sa likod sa SUV sa aktres ug naguba sab ang atubangan sa van samtang natanggal ang windshield.

Samaran ang drayber sa maong van human maipit samtang suwerteng naluwas ang lima ka pasahero apil na ang usa ka bata.

Daling gidala sa St. Luke's Medical Center si Magdangal ug ang iyang bana nga si Escueta ug naluwas na sa maong aksidente. (Joanna Karla Alimes, ADDU Intern/SuperBalita Davao)