COMPOSTELA VALLEY PROVINCE -- Usa ka mag-uuma patay human gitigbas sa iyang paryente didto sa Purok 3, Sitio Bangkal, Barangay Datu Ampunan, lungsod sa Laak sa alas 3:00 sa hapon, Lunes.

Ang biktima mao si Allan Asad Dengi, mag-uuma ug molupyo sa Purok 3, Sitio Bangkal, Barangay Datu Ampunan.

Subay sa report sa Compostela Valley Provincial Police Office, nasayran nga ang biktima gitigbas sa iyang paryente nga si Dante Dengui Asad sa makadaghang higayon gamit ang mahait nga hinagiban samtang nag-inom sa nahisgutang dapit.

Ang biktima nakahiagom og samad tinigbasan sa likod nga bahin sa lawas, ingon man sa liog nga misangko sa hinanaling kamatayon.

Base sa imbestigasyon, ang suspek ug ang biktima adunay personal nga panagbangi bahin sa ilang umahan nga gitamnan og mga produktong pang agrikultura nga maoy nagtukmod sa suspek nganong nahimo ang krimen.

Hinuon, boluntaryong mitahan sa kaugalingon ang suspek ngadto sa ilang tribal leader ug sa mga sakop sa 72nd Infantry Battalion sa Philippine Army, ubos ni Sergeant Agravante.

Patay'ng lawas sa biktima atua gihaya sa ilang panimalay sa Purok 3, Sitio Bangkal, Barangay Datu Ampunan. (DTV)