GISUTA sa tinugyanan sa kapulisan inubanan sa Martial Law Special Action Group (ML-SAG) ang giingong lawak nga gi-abangan sa giingong maglive-in nga nasikop sa siyudad sa Iloilo niadtong milabay nga adlaw sa sakop sa Philippine Coast Guard.

Mga personal nga gamit na lamang ang anaa sulod sa maong lawak nga gi-abangan sa maong mga suspetsado kinsa taod-taod na nga nag-abang diha sa Zone-4 Tambo, Barangay Carmen, siyudad sa Cagayan de Oro.

Gikompirma ni Chief Inspector Ariel Philip Pontillas, hepe sa City Intelligence Unit (CIU), nga positibo nga nag-abang ang mga suspek sa maong lawak.

Nasayran nga ang mga personal nga gamit na lamang ang anaa sa maong lawak samtang gisusi pa sa mga otoridad kung aduna pa kini sila’y mga laing kauban.

Gikabutyag nga dako gayud ang posibilidad nga makaabot ang maong teroristang grupo dinhi sa siyudad tungod kay duol lang kini sa siyudad sa Marawi. Gawas niana, makalusot sila tungod na kay gagamit kini sa mga pekeng identipikasiyon.

Padayon nga naghangyo ang mga kapolisan sa makanunayong suporta sa katawhan pinaagi sa pagtaho dayon sa mga otoridad kung aduna’y mga kadudahang butang o personahe.