TAG-TULO ka mga handheld radio ang gitunol ni Misamis Oriental Governor Yevgeny Vincente Emano ngadto sa 25 ka mga police station sa lungsod sa Misamis Oriental.

Gibutyag ni Nicole Managbanag, Provincial Information Officer, nga gawas niini miapod sab ang gobernador og usa ka based radio matag police station ug ingon man ngadto sa duha ka mga siyudad sa Misamis Oriental nga mao ang El Salvador ug Gingoog City.

Kagahapong adlawa pormal nga giturn-over sa gobernador ang maong mga hand held radio ngaadto sa kapolisan.

Dugang ni Managbanag nga suportado kanunay ni Emano ang kapolisan aron padayon ang ilang paghimo og maayong tahas diha sa pagpahapsay sa kalinaw sa probinsya.

Pinaagi sab sa handheld radio mas sayon ang komunikasyon nga mapaabot ngadto sa kapolisan.

Hangyo sab ni Emano sa kapolisan nga himoun ilang tahas ug protektahan ang katawhan sa probinsya ug sikopon ang masinupakon hilabina gyod niadtong nagpadayon sa ilang mga ginadili nga kalihokan. (SVB)