GIPAHIGAYON ang usa ka peace rally niadtong Biyernes, Pebrero 10, isip panawagan kang Pangulong Rodrigo Duterte nga subling buhion ang hinabing pangkalinaw.

Si Bayan Secretary General Sheena Duazo nagbutyag nga ang maong peace rally pasiuna sa ipahigayong mas halapad nga panagtapok karong umaabot nga Pebrero 24.

Alas 3 niadtong Biyernes sa hapon nagtapok ang mga militante sa Freedom Park sa Davao City alang sa ilang hashtag #PeaceTalksItuloy!

Suma niya, sundan nila kini karong Pedrero 14 alang sa “One Billion Rising” sa Rizal Park ning dakbayan.

Karong Pebrero 17 mosunod sab ang usa ka Peace Rally dayon mahitabo ang “Unity Walk For Peace” karong Pebrero 24 nga pangunahan sa Exodus For Justice and Peace.

Si Duazo daan nang namahayag nga mohimo sila og mga rally aron kombinsihon si Duterte nga subling buhion ang peace talks tali gobyerno ug National Democratic Front of the Philippines (NDFP).

“We urged the president to resume the peace talks and adhere or honor all agreements previously signed by the Government of the Republic of the Philippine)-NDFP,” butyag ni Duazo.

Si Duazo nagbutyag nga manawagan sab sila sa Pangulo nga ihunong ang militarisasyon sa kabukiran labi na sa mga dapit sa Southern Mindanao Region.

Bisan pa man sa pagwagtang sa peace talks, gipanawagan gihapon sa NDFP nga buhian ang mga political prisoners aron mahatagan og hustisya ang ilang pagkabilanggo sanglit biktima sila sa nanglabay nga administrasyon.

Kahinumdoman nga usa sa giingong mga hinungdan sa pagwagtang sa New People’s Army sa ilang unilateral ceasefire mao ang wala pagtuman ni Pangulong Duterte nga buhian ang mga political prisoners.