NASAPONG gisakyan ug gipadagan sa usa ka lalaki ang giparada nga motorela kagahapon mga ala 1:45 sa kadlawon sa atbang sa Fatima, Camaman-an, Dakbayan sa Cagayan de Oro.

Gihatod ngadto sa kapolisan ang suspetado nga naila nga mao si Richard Cudlayan, lumulupyo sa Velez Street, Divisoria ning dakbayan.

Ang maong motorela gipanag-iyahan ni Riel Jumbo Adora, mulopyo sa Dongallo, Hillside, Camaman-an samtang ang drayber niini mao si Dionie M. Perez residente sa Camaman-an ning dakbayan.

Subay sa report sa kapolisan sa Police Station 2 sa Cogon nga samtang giparada sa drayber ang maong motorela sa nahisgutang dapit nasapon gayud ni Adora ang suspetsado nga gisakyan niini ang motorela ug kusog kining gipadagan.

Dali nga nagpakitabang ang biktima sa mga Barangay Police kinsa nag-roving niadtong higayon hinungdan nga malampusong nasikop ang suspetsado.

Sa pagsulat niini nga balita ang maong suspetado ang kasamtangang nagtingkagol na sa prisohan alang sa pagpaabot sa tukmang kasong posibleng ipahamtang batok kaniya.