SIYAM ka mga tinun-an sa St. Louise De Marillac College sa dakbayan sa Bogo ang daling gidala sa tambalanan kagahapon sa buntag gumikan sa giingong hysteria.

Laing lima ka mga estudyante sa Grade 9 sa University of the Visayas, Pardo campus, siyudad sa Sugbo, ang gidala sa Mary’s Little Children Community sa Barangay Tabunok, dakbayan sa Talisay kagahapon kay giingong nasudlan og dautang espiritu.

Apan, opisyal sa simbahang Katoliko sa Sugbo niingon nga dili dayon angay tuhoan nga nasudlan og dautang espiritu ang usa ka tawo.

Si Msgr. Joseph Tan, tigpamaba sa Artsidyosesis sa Sugbo, namulong nga angay tan-awon kon gidili nga drugas ba, depresssion o mental breakdown ang hinungdan sa kalit nga pagsiyagit o paghilak sa tawo.

“Dili ta magdalidali og conclude nga na-possess ang tawo until proven ang all human causes,” dugang niya.

Ang tagdumala sa SLDMC dali niklaro nga base sa pasiuna nga resulta sa Cebu Provincial Hospital sa Bogo, sila nakasinati og panic attack disorder.

Matod sa maong tunghaan dili kini kaso sa evil possession o food poisoning.

Samtang, wa gikompirmar sa tagdumala sa UV Pardo nga nasudlan sa dautang espiritu ang ilang mga tinun-an.

Tungod sa mga hitabo, gisuspenso ang mga klase sa duha ka tunghaan apan, pagka hapon nabalik ra ang klase sa SLDMC. (SCG)