GIBUTYAG ni Commander Jerome Cayabyab sa Philippine Coast Guard- Cebu nga 10 pa ka sakyanan sa kadagatan ang anaa sa ilang lista nga opisyal nga nagparehistro sa Maritime Industry Authority.

Iyang gipadayag nga posibleng mosaka pa ang gidaghanon sa magpalista sanglit hangtod pa sa Enero 17 manawat ang Marina og mga bangka o barko nga gustong moapil sa seaborne procession.

Ang Marina nagkanayon nga adunay bayad nga P900 para sa mga motor banca nga moapil ug gikan sa P2,000 pataas ang bayad alang sa mga barko nga magdepende sa gidak-on.

Giangkon ni Cayabyab nga di nila malikayan nga adunay nga pumpboat nga di magparehistro nga mokuyog sa seaborne procession, apan iyang gipadayag nga anaa ang Coast Guard nga mobantay o masiguro nga di sila makapaduol sa galleon. (PAC)