ILIGAN CITY -- Patay ang usa ka negosyante human kini gipusil sa wala mailang mga suspek niadtong niaging adlaw samtang nagkaon sulod sa usa ka kan-anan sa Lluch Street, Barangay Poblacion ning dakbayan.

Pito ka samad ang naangkon ni Jerry Wences Salatan Chin nga maoy hinungdan sa iyang hinanaling kamatayon.

Sa inisyal nga imbestigasyon sa Iligan City Police Station 5 nga usa ka wala mailang lalaki, naka-helmet ug nag-jacket og itom ang miduol sa biktima dayon pusil niini.

Misibat ang suspek sakay sa usa ka "scooter motorcycle" nga adunay nag-escort nga laing motorsiklo.

Nakuha sa Scene of the Crime Operation gikan sa crime scene ang mga basiyo sa bala sa kalibre 45 ug upat ka dagku'ng pakete sa gituohang shabu ang nakuha gikan sa biktima.

Matud ni Police Inspector Enrique Dungog, tigpamaba sa Police Station 5, nga usa sa ilang gitan-aw nga motibo sa pagpamusil ang kalambigitan sa druga tungod sa nakuha gikan sa biktima nga gituohang shabu bisan pa man nga wala kini sa ilang drug watchlist.

Gitan-aw usab nila nga motibo sa pagpamusil ang personal nga background ug ang kabahin sa negosyo.