GIKLARO sa National Food Authority (NFA) Northern Mindanao nga walay peke nga bugas sa siyudad sa Cagayan de Oro.

Kini ang gibutyag ni Victoria Duray kinsa Assistant Regional Director sa NFA-Northern Mindanao.

Gipasabot niini nga human nila nadawat nga adunay peke nga bugas ila dayon kining gisunod ug giimbestigahan.

Nasuta nga dili kini peke ug gani lami kini kan-on nga bugas tungod kay daw ‘well milled’ kaayo kini.

Hinuon gibutyag niini nga sa unang tan-aw mamatikdan ang kasinaw niini ug matouhan nga peke apan ang bugas usa ka klase sa maayo nga pagka-ani.

Nasuta nga ang bugas nagikan sa nasod sa Thailand.

Kahinumduman adunay mireklamo sa Barangay Carmen tungod sa giingong peke ang ilang nakaon nga bugas hinungdan nga deretso kining giaksyunan sa NFA.

Gipasabot usab ni Duray nga walay bisan kinsa nga makapamaligya og peke sa siyudad tungod kay sa dili pa mamaligya ang mga mamaligyaay gikanahanglan usa nila nga mangayo og permit sa ilang buhatan.