NIKAMPEYON ang Kagayanong si Banjo Norte sa 2017 Cobra Ironman 70.3 Philippines Asian elite division niadtong Dominggo, Agusto 6, sa Shangri-La Mactan Resort and Spa, Lapu-Lapu City.

Samtang, duha pa ka mga Kagay-anon nga sila Brian Borling ug Jen Paloma ang niuli og dungog alang sa Cagayan de Oro City.

Gidominar ni Norte ang iyang division agi sa upat ka oras, 35 minutos ug 50 segundos ug ligas lang og unom ka minutos kontra sa nagsunod nga si Paul Jumami nga nihuman sa 4:41:35.

"Sa wakas nibalik ra iyang porma," ingon sa usa ka biker sa dakbayan nga si Randolf John "Jan-Jan" Cua.

Matod ni Cua nga unang nikampyon si Norte sa maong torneyo niadtong 2013 ug naparot sa sunod nga mga katuigan.

Sila Borling ug Paloma nangdaug sa ilang kadaiyang age groups sa prestiyusong triathlon competition.

Si Borling nilanding sa ikaduha nga pwesto sa male 30-34 category, samtang si Paloma nitungtong sa ikatulo nga pwesto sa female 18-24 category.

Parehas ang tulo nga qualify ngadto sa 2018 World Ironman Competition didto sa Africa.