SUPORTADO sa Philippine Drug Enforcement Agency (PDEA)-Northern Mindanao ang lakang sa kapolisan nga bag-ong sistema sa Oplan Tokhang.

Gibutyag ni PDEA Agent Calibre nga motabang sila sa kapolisan sa pagpahigayon sa Oplan Tokhang basi sa gimando sa ilang bag-ong director nga si Regional Director Wilkins Villanueva.

Giklaro ni Calibre nga kining Oplan Tokhang sa kapulisan nga motoktok hangyo sa mga drug user/pusher sa kabalayan ang adunay mga gabayan nga dili sila dakpon, igo lamang hangyuon ug storyahon sa kapulisan ug tambagan nga hunungon na ang kalihokan diin sila mao ang gitawag nga Barangay drug watchlist.

Lakip na niini ang lakang sa gobyerno nga ipaubos dayon sila og rehabilitasyon.

Gipasabot ni Calibren nga motabang sila og hangyo ug pagpasabot sa bag-ong programa sa gobyerno nga undangon na kini.

Apan daw lahi sab kining drug bust ngadto sa mga identified drug pusher.

Matud ni Calibre nga gikinahanglan gayud sab sa kapulisan nga makig-koordinar kanila panahon sa operasyon tungod kay daw basin unya nga mabasura ang kaso sa nadakpan kon kini napasaka na sa korte. (SVB)