ANG gikahinaman nga Visayas Quarterfinals sa PSC-Pacquiao Amateur Boxing Cup ipahigayon karong Pebrero 24-25 sa Enan Chiong Activity Center (ECAC) sa City of Naga, Cebu.

Moabot ngadto sa 62 ka boxers gikan sa nagkalainlaing siyudad ug probinsiya ang mag-ilog og lingkuranan alang sa semifinals round nga ipahigaon karong Marso 10 sa San Jose, Antique, matod pa ni supervising technical director Rogelio Fortalez sa Philippine Sports Institute.

Ang Team Omega-Mandaue ug Bago City nga gilangkuban og pito ka mga boxers matag usa, maoy top qualifiers sa quarterfinals.

Mga pambato sa Omega mao sila si Alex Andrhei Bonita (44-46 kg), Jim Paul Dignos (48 kgs.) ug Gaudfrey Lubiano (50 kg.) sa Junior Boys Division.

Anaa usab kanila sila si Arlan Wenn Melgo (46-49 kg.), April Jay Abne (52 kg.), Jhorhe Pasculado (56 kg.) ug Jarah Hury Aragon (60 kg.) sa Youth Boys category. (JBM)