ARON mas mapadali ang pag-apply og exemption sa total gun ban atol sa election period sa sunod tuig, ang Commission on Elections (Comelec) nipahibalo nga mahimong makuha ang application form alang niini sa ilang website.

Matod ni election officer, Atty. Ferdinand Gujilde, nga posibleng karong semanaha available na ang porma sa Comelec website, subay usab sa memorandum nga gipakanaog sa ilang ulohang buhatan sa miaging semana.

Magsugod ang election gun ban sa Enero 10 hangtud sa Hunyo 8 sa sunod tuig 2016.

Gipasabot ni Gujilde nga ang porma sa ilang website, kinahanglan pang i-download ug i-print unya i-fill-up sa mga buot mo-apply og exemption sa total gun ban.

Alang niadtong mga security agency, adto kini  isumitir ngadto sa Comelec central office samtang, kadtong mga security aide, mga cashier ug uban pa, adto kini iduso sa Provincial Joint Security Control Center.

Bisan kadtong mga dunay permit to carry firearm, gipasabot ni Gujilde, mahulog kini nga revoked sa pagsugod sa election period ug magamit lang nila ang ilang armas sa higayon nga makakuha sila og exemption sa total gun ban gikan sa Comelec.