CAMP SIONGCO, Maguindanao Province -- Gimugna sa 6th Infantry (Kampilan) Division, Philippine Army ang usa ka task force nga maoy motutok sa seguridad sa mga botante ug sa mga personahe sa Commission on Election (Comelec) sa Mayo 9 nga eleksiyon sa Lunes.

Kini mao ang Task Force Chop (clean, honest, orderly and peaceful elections) nga gipangulohan ni Colonel Romeo Brawner, 6th ID's chief-of-staff kinsa dunay usa ka libong mga sakop.

Ang TF Chop dunay mga combat vehicles, tanks ug motorized watercrafts alang sa security operations sa marshland areas ug mga polling precincts nga anaa sa utlanan nga bahin sa Maguindanao ug North Cotabato.

Matud ni 6th ID Chief, Major Edmundo Pangilinan nga ang TF Chop dunay mga team sa long-range snipers nga maglihok ilawom sa Comelec.

Gimugna ang tasf force sa 6th ID Headquarters sa Camp General H. Siongco Awang, Datu Odin Sinsuat nga gipangunahan ni Pangilinan, uban si Philippine Army Chief Major General Eduardo Año.

Giklaro ni Pangilinan nga ang election security duties sa task force dunay direkta nga koordinasyon sa matag lihok niini sa joint ceasefire committee sa gobyerno ug Moro Islamic Liberation Front.

Gipasalig sab sa MILF nga mag-reposition ang ilang puwersa duol sa mga polling precincts apan motabang sa mga otoridad sa seguridad sa piniliay. (EEF)