ORMOC CITY, Leyte - Suspek nga tigpayuhot og ilegal nga drugas ning dakbayan wa maabti og Bag-ong tuig.

Kini human mapatay sa kapulisan nga milusad og buy-bust operation kani­ya sa may taytayan sa Barangay Alegria ning dakbayan.

Giila ang nakalas nga si Em Luzares, 37, usa ka contractor ug nagpuyo sa Barangay Cogon ning dak­­­bayan.

Narekober kang Luzares ang usa ka pakite sa gituhoang shabu.

Samtang narekober sud sa iyang sakya­nan nga Kia nga dunay plakang GPC 352 ang usa ka kalibre .38 nga revolver ug upat ka bala.

Duna usab duha ka fired cartridge sa kalibre. 45, usa sa kalibre .9mm nga pistola ug duha ka basiyo sa kalibre .45, duha ka cellphone ug P500 nga marked money.

Base sa spot report sa kapulisan, alas 11:00 sa gabii niadtong Dis­yembre 31 gilusad ang operasyon pinangulohan ni P/SInsp. Joseph Joevil Young, hepe sa Station 3.

Nagsilbi nga poseur buyer sa operasyon si PO3 Edwin Tahil.

Atol sa tinunolay, nakabantay si Luzares nga pulis ang iyang ka transaksyon busa mibunot kini sa iyang armas og mition kang Tahil butang nga nakaaghat sa kapulisan sa pagpusil kang Luzares.

Patay diha-diha si Luzares kinsa nagsandig sa driver’s seat sa iyang awto samtang abli ang pikas pultahan niini gumikan kay posible sa maong habig nagpwesto ang kapulisan.

Si Luzares anaa sa target list sa kapulisan human sa gihimong pagpaniid sa ilegal niini nga kalihukan.