MIABOT na sa 12,341 ang kinatibuk-ang ihap sa mga kumpirmadong kaso sa Covid-19 sa Cagayan de Oro human 154 ka mga residente sa dakbayan ang mipositibo sa novel coronavirus, sumala sa report sa City Health Office Huwebes, Hulyo 29.

Sumala sa City Health Office, sa 154 ka mga bag-ong lokal nga kaso, 73 ang mga local index nga mga kaso, 59 ang mga close contacts sa mga pasyenteng nagpositibo sa coronavirus, 11 ang mga lokal authorized persons outside residence (Apors), walo ang mga Apors with link, ug tulo ang mga patay.

Ang Cagayan de Oro adunay 1,587 ka mga active cases, 515 niini na-admit sa Northern Mindanao Medical Center ug uban pang mga ospital sa syudad, ug 1,072 ang mga outpatients.

Nakatala usab og 81 ka mga coronavirus-positive nga mga kaso nga karon naka-recover. Anaa na karon sa 10,214 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 540.