NAKADAWAT og ganti ang pipila ka mga Barangay nga aktibo sa pagprotektar sa katungod sa mga kababayen-an ug mga kabataan sa Search for Outstanding Violence Against Women (VAW) and Children Desk 2018.

Gikan sa non-numbered barangay nasakmit sa Barangay Tablon ang Outstanding Violence Against Women (VAW) and Children Desk diin nakadawat og P50,000, gisundan sa Barangay Lapasan diin nakadawat og P40,000 ug Barangay Agusan nga nakadawat og P30,000.

Samtang sa numbered barangay nga kategorya, nasakmit usab sa Barangay 27 diin nakadawat og P35,000, gisundan sa Barangay 22 diin nakadawat og P30,000, ug Barangay 18 sa kantidad nga P25,000.

Gibutyag ni Kagawad Edna Dahino, chairperson sa Komitiba sa Women and Family Relations, nga kini ang labing unang higayon nga natagaan og pagtagad ilabi na ganti ang mga aktibong barangay sa VAWC desk diin dako kini og tabag sa matag pamilya.

Sa 18 ka adlaw nga kampanya, gibisita ang mga barangay ug gi-edukar ang mga residente kalabot na sa Republic Act 9262 o Anti-Violence Against Women and Their Children Act, ug gi-aghat ang kooperasiyon sa katawhan sa pagtaho kung ugaling dunay mga nasayran nga nangabuso diha sa mga kababayen-an lakip na sa ilang mga anak.

Lakip sa criteria mao ang pagsusi kung duna kini sila’y mga nag-unang ekipo diha sa pagresponde sa mga posibleng kaso sa pagpangabuso ilabi na kining first aid kit ug uban pa. (KCS)