ILIGAN CITY -- Tulo ka sunod-sunod nga mga pagbusikad ang nahitabo sa Lanao del Norte niadtong Martes, Pebrero 5, usa ka adlaw sa dili pa ang adlaw sa plebisito kon diin disisyunan ang kapalaran sa unom ka munisipyo kon malakip ba sila sa Bangsamoro Government.

Pasado alas 4 sa hapon adunay pagbusikad sa Barangay Maranding, ang business center sa lungsod sa Lala, samtang mga pila ka minuto ang nilabay mibusikad na usab sa lungsod sa Kauswagan.

Pagka alas 10 sa gabii usa ka ekplosyon nahitabo sa Sultan Naga sa lungsod sa Dimaporo sa Lanao del Norte.

Ang tulo ka mga lungsod dili lakip sa unom ka mga lungsod nga anaa sa Bangsamoro area.

Matud ni Col. Alex Aduca, commander sa Joint Task Force Plebisito, niingon nga ang gamay nga improvised explosive device ang gilabay sa wala mailang suspetsado nga sakay sa trak nga “kumong-kumong.”

Walay kaswalidad nga natala sa tulo ka mga pagbusikad.

Mas gipahugtan na ang seguridad hangtod niadtong adlawng Miyerkules, Pebrero 6, kon diin adlaw na gyod sa pagboto.

Dili pa masuta kon ang pagbusikad adunay kalambigitan sa gikatakdang Bangsamoro Government.