GIPASALIG sa upat ka mga Kagay-anon nga bag-ohay lang nigradwar sa Philippine Military Academy (PMA) ang tinuoray nga serbisyo dili lamang sa siyudad apan sa tibuok nasud.

Lakip sa 263 ka mga nigradwar sa PMA “Mabalasik” Class 2019 o (Mandirigma ng Bayan Lakas at Sarili Iaalay para sa Kapayapaan) mao ang upat ka Kagay-anon diin usa ang babaye ug tulo ka mga lalaki.

Sila mao si 2nd Lt. Alfraim Sheine Gomez, 24, Philippine Air Force, taga Barangay Lumbia; 2nd Lt. Hanz Gerones Roa, 21, taga Barangay Kauswagan ug duha ka mga Philippine Navy nga sila si Ensign John Bryan Terosa Bilagantol, 26, taga Camp Evangelista ug Ensign Kenneth John Bomediano Cayanga, 23, taga Apovel, Barangay Patag.

Gibutyag ni Gomez nga garbo kini sa siyudad ug gipasalig ang tinuoray nga serbisyo ilabi na ang pagsunod sa kamandoan alang sa seguridad sa katawhan sa siyudad ug sa tibuok nasud.

“We assure you sir, ma’am that we will serving our country with honor and integrity, so that you our fellow Kagay-anon may live each day peacefully knowing that there are servant leaders who will ensure the nation's order and security,” matud ni Gomez.

Garbo usab night Gomez isip usa ka babaye ang paglampos niining maong upat ka tuig nga subsob sa training ug uban pa nga kinahanglan nga mosabay sa mga kalalakin-an ilabi na nga usa ka babaye ang namahimong top sa “Mabalasik” class nga si Dionne Mae Apolog Umalla nga taga Alilem, Ilocos Sur.

“It's great honor and challenge sa tanan nga mga females sa nisulod sa PMA kasi kailangan talaga naming makipagsabayan sa mga lalaki and we have to prove ourselves na ang female pud is capable pud in venturing into something, this time gi-proved nato nga mga babae kaya pud nga maka-survive,” dugang niini.