KAPIN singkwenta ka mga indibidwal ang nasikop atol sa Oplan Galugad nga gipahigayon sa tanang police station sa siyudad sa Cagayan de Oro.

Anaa sa 53 ka mga tawo ang naaresto sa 41 ka operasiyon nga gipahigayon sa kapulisan sa Cagayan de Oro Police Office (Cocpo).

Atol sa press conference gibutyag sa bag-ong tigpamaba sa Cocpo nga si Police Lieutenant Colonel Ivan Viñas nga labing dakong kalapasan mao ang pagpatay samtang ang uban atoll sa buy-bust operation.

"Dunay nadakpan batok murder sa station 5 through warrant of arrest, dunay search warrant, ug ubay-ubay adunay nakuha nga shabu pinaagi sa warrant of arrest, tanan nga station apil na special unit," matud ni Viñas.

Gipahimangnuan usab niini ang mga ginikanan nga angayang disiplinahon ang mga anak nga dili angayang pasagdan sa kadalanan panahon sa gabii o kadlawon ilabi na nga hugot kini karong direktiba ni Police Colonel Henry Dampal, city director, nga ang mga menor de edad dalhon sa estasiyonan kun ma rescue aron ipa-ilalom sa counseling.

"Atong mga ginikanan atong gipahimangnoan nga ang ilang anak ilang tagaan og disiplina sa ana nga oras nga di na sila magpakita sa dalan kay dunay atong ordinansa," dugang pa.