MGA tunga sa milyon ang kantidad sa matag-usa ka trained nga K-9 dog nga gitakdang itunol sa lokal nga kagamhanan sa siyudad ngadto sa Cagayan de Oro City Police Office.

Matud ni Kagawad Romeo Calizo, tsirman sa komitiba sa Police, Fire and Public Safety, nga kini mao ang dinaliang tubag sa panginahanglanon sa kapulisan sa siyudad ilabi na sa mga namonitor nga mga pagpanghulga sa terorismo.

“Malooy naman gud ta nga atong e-deploy atong intelligence units and our intelligence unit maglisod man sila og detect gud sa bombs hasta drugs kay sa drugs only the dog can do that,” matud ni Calizo.

“The committee decided the procurement of seven trained dogs already, trained dogs lang and the we’ll come with the memorandum or MOU... the LGU (local government unit) will procure this plus the initial maintenance requirement, dog food but the other components should be shouldered by Cocpo (Cagayan de Oro City Police Office),” dugang ni Calizo.

Bisan sa kadako sa kantidad sa matag iro apan andam ang siyudad nga mo-abaga niini alang sa kaluwasan ug kalinaw sa dakbayan.

Giingong ang pito ka mga nabansay nga mga K-9 dog anaa sa mga P3.150 milyones apan maghatag ang siyudad og P3.570 milyones alang na usab sa mga inisyal nga panginahanglanon sa pagkaon sa iro lakip na usab sa inisiyal nga panginahanglanon usab sa pagbansay sa handler niini.

“Ako nang e-propose sa commitee on finance, in principles already approved, go na na,” dugang niini. (KCS)