MISAKA ang ihap sa mga kumpirmadong kaso sa Cagayan de Oro human kini mitala og 99 ka mga bag-ong lokal nga mga kaso sa coronavirus disease (Covid-19), sumala sa report sa City Health Office Huwebes, Hunyo 8.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 10,496.

Matud sa City Health Office, sa 99 ka mga bag-ong lokal nga kaso, 59 ang mga local index nga mga kaso, 30 ang mga local case with link, pito ang mga lokal authorized persons outside residence (Apors), usa ang person deprived of liberty (PDL), ug duha ang mga patay.

Ang Cagayan de Oro adunay 984 ka mga aktibo nga mga kaso, 320 niini na-admit sa Northern Mindanao Medical Center (NMMC) ug uban pang mga ospital sa syudad, ug 664 ang mga outpatients.

Nakatala usab og 63 ka mga Covid-positive nga mga kaso nga karon naka-recover. Anaa na karon sa 9,018 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 494.