WALA'Y nakitang samad dinunggaban, o agi, o pagpanamastamas sa usa ka langyaw nga napalgang patay niadtong 10:42 sa gabii Lunes, Septiyembre 15, sa Barangay Camanan-an, Cagayan de Oro City.

Naila ang langyaw nga si Brian Roche, 59, divorced, ug usa ka US citizen nga nanimuyo sa Boston, Massachusetts, USA, kinsa kasamtangang dunay kaipon nga si Lani Manzano, 49, residente sa maong dapit.

Sa nahipos nga impormasiyon, gikabutyag nga nakurat nalang si Manzano nga wala na kini pulso rason nga nagpakitabang sa kapulisan. Wala na kini kinabuhi sa pag-abot sa kapulisan ug wala'y nakitang mga samad.

Sa inisyal usab nga imbestigasiyon, nasuta nga dunay sakit ug nigawas sa balay tambalanan bisan pa man nga wala ang panugot sa mga doktor.

Nagpahigayon usab og imbestigasiyon ang Scene of the Crime Operatives (Soco)-Northern Mindanao sa maong dapit aron usab mapailalom sa otopsiya ang patay nga lawas, ilabi na nga kung magpahigayon ang gobyerno sa Amerika og kaugalingong imbestigasiyon.