KARON nga gakasinati na ang pag-ulan-ulan sa lalawigan sa Misamis Oriental, hatagan og binhi ang mga mag-uuma nga apektado sa hulaw niadtong nilabay nga mga bulan.

Gipaniguro sa buhatan sa Provincial Agriculture Office sa pagpangulo ni Provincial Agriculture Office head Apollo Pacamalan nga naapod-apod na ang binhi alang ngadto sa mga mag-uuma sa lalawigan.

Gibutyag ni Pacamalan nga kay ting-ulan na kinahanglan na nga masugdan na sa mag-uuma ang pagpananom aron maayo ang tubo niini.

Aduna na usab silay gibilin nga binhi ngadto sa mga munisipyo sa lalawigan kay ang munisipyo mas maoy nasayod ug nakaila sa mga mag-uuma nga apektado dihang nasinatian ang hulaw.

Apan panawagan ni Pacamalan nga kung ang mga mag-uuma walay nadawat nga binhi gikan mismo sa ilang lungsod, ang pwede lang kaayo mobisita sa ilang buhatan kay andam sila sa paghatag sa mga nagkinahanglan.