NAGBUY-OD nga walay panimuot ug puno sa pasa sa nawong ang 29-anyos nga asawa human gikulata sa kaugalingon nga bana mga alas 8:25 sa buntag niadtong adlaw’ng Dominggo, Oktubre 20, sa Sitio Kilaa, Alga, lungsod sa Catarman, Camiguin.

Dead on arrival sa Catarman District Hospital si Jen Banaag Palin, residente sa dapit.

Ang amahan mismo ni Palin nagpatabang sa kapolisan sa Catarman Police Station human iyang naabtan nga nagbuy-od ang iyang anak nga grabe ka hubag ang nawong human giingong gikulata ug gituok sa kaugalingon nga bana niining si Ryan G. Palin, 30.

Si Dr. Alwahib Pacol M.D. niingon nga posibleng hinungdan sa kamatayon sa biktima mao ang pagmaga ug hematoma sa iyang upper ug lower lip, abrasion sa zygomatic area.

Sa inisyal nga imbestigasyon sa kapolisan, gisulti sa anak niini nga nagkalalis ang iyang mga ginikanan human giingong nagselos ang iyang amahan.

Nahinaykan sa suspek ug iyang napatay ang iyang asawa dihang giangkon niining aduna kini laing lalaki.

Misuway pa og layas ang bana paingon sa Tablon, dakbayan sa Cagayan de Oro.

Sa hiniusang pwersa sa kapolisan sa pagpanguna hepe sa Catarman Police Station nga mao si Police Captain Gumer Ladera ug Police Station 10 sa Cugman nga mao si Police Captain Allan Cairel, ilang nadakpan ang suspek mga alas 6:30 sa gabii sa susamang adlaw.

Ang suspek namahayag nga napuno na siya sa binuhatan sa iyang asawa human giingon niini nga makadungog sa mga silingan nga aduna kini lain lalaki.

Mas nisamot ang kaulit niini dihang nakumpirma niya human miangkon iyang asawa.

Kasong parricide ang atubangon sa suspek karon panahona ug gidala na og balik sa Catarman Police Station.