GIANGKON sa asawa nga naa kini lain human nasapon sa bana nga dunay ka-chat sa Facebook niadtong nilabay nga adlaw diha sa Upper Carmen, siyudad sa Cagayan de Oro.

Ang bana naila nga si Alden (dili tinuod nga ngalan), 39, minyo, samtang ang asawa naila nga si Britta (bansagon gitago), 36, residente sa nahisgutang dapit.

Sa nahipos nga impormasiyon gikan sa kapulisan sa Police Station 4 (PS4) sa Carmen, gikabutyag nga nidangop si Alden sa maong buhatan ug gireklamo ang asawa.

Giingong nasapon niini sa dihang gisulayan sa pagbukas ang cellular phone ug nakitang dunay nigawas nga messenger nga bag-o kaniya, hinungdan nga gipangutana ang asawa apan nagdumili kini.

Gidugang pa nga giingnan niini ang asawa nga kung dili kini ablihan, modangop kini sa Philippine National Police Cybercrime Unit aron mabuksan ang messenger, hinungdan nga gikabalaka sa asawa ug giangkon nga duna kini lain.

Gibutyag pa niini nga usa na kini ka tuig nga nakigrelasiyon sa laing lalaki ug gani, duna nay nahitabo kanila nga gikasakit pag-ayo sa bana.

Ang maong insidente ang nakatala na sa buhatan sa kapulisan alang sa tukman aksiyon.