BABAYE gitigbas patay sa iyang silingan nga lalaki human unang nakalalis niini ang asawa ug anak sa suspek niadtong niaging mga adlaw sa Barangay Mandahilag, Talisayan, Misamis Oriental.

Giila ang biktima nga mao si Melodia T. Ordinal, 58, minyo, residente sa susamang dapit.

Gitumbok nga suspetsado ang silingan nga mao si Michael Mandapiton, 46.

Sa inisyal nga imbestigasyon sa Talisayan Police Station, nasayran nga unang nag-away ang biktima ug asawa ni Mandapiton.

Giingong nadungog niining suspek ang mga dili maayong pulong nga gibuhian sa biktima ngadto sa asawa hinungdan sa kaulit niini mikuha ug bolo ug gitigbas.

Basi sa report sa Talisayan Police Station, nasuta nga dugay na adunay bangi ang sigka pamilya gumikan sa tsismis.

Gisuwayan pa og dala sa Misamis Oriental Provincial Hospital sa Talisayan ang biktima nga nakaangkon og daghang samad tinigbasan sa lawas, apan dead on arrival nga gideklarar sa mga doktor.

Bitbit ang bolo, boluntaryo sab nga mitahan sa Police Station ang suspek kinsa mag atubang og kasong murder.